Ўзбекистон XXI асрга дадил ва қатъий ишонч билан қадам қўйди. Демократияни янада чуқурлаштириш, иқтисодиётни тубдан эркинлаштириш, инсон ҳуқуқлари кафолати ва ҳимоясини кучайтириш бўйича йирик тадбирлар ижросига киришилди. Ишлаб чиқаришнинг ўсиши, унинг замонавий технология асосида тузилмавий қайта қурилиши, мулкдорлар қатламининг шаклланиши, қадрланиши ҳамда банк-молия тизимининг барқарорлашуви жараёни тобора кучайиб бормоқда.
      Сўзимизнинг исботи сифатида истиқлол йиллари «Пахта Банк» босиб ўтган йўлга, унинг серқирра фаолияти ёрқин «бекат»лари ёҳуд «Пахта Банк» ютуқлари силсиласига разм солайлик:
«Пахта Банк» тарихининг илдизлари «Ўздеҳқонсаноатбанк»и, ундан аввал эса тўғридан-тўғри Агросаноатбанкига бориб тақалади. 
  • 1992 йил «Ўздеҳқонсаноатбанк»ига Ўзбекистон Республикаси Марказий банки томонидан чет эл валюталарида операцияларни амалга ошириш учун Бош лицензия берилди.
 • 1993 йил мамлакатимизда биринчи марта «Ўздеҳқонсаноатбанк»и томонидан Туркия «Зираат Банкаси» билан биргаликда «ЎТ Банк – Ўзбекистон – Туркия қўшма банки» таъсис этилди. 
 • Шу йилнинг ўзида Банк томонидан "Инвестиция воситачиси" лицензияси олинди ва "Тошкент" Республика фонд биржасининг 001-сонли брокерлик идораси очилди.
 • 1995 йилнинг июль ойида Деҳқонсаноатбанкининг истиқлол йиллари ҳаётида янги зарварағи очилди. Вазирлар Маҳкамасининг 1995 йил 27 июлдаги 294-сонли қарорига биноан Ўздеҳқонсаноатбанки Ихтисослаштирилган Акциядорлик Тижорат «Пахта Банк»ига айлантирилди. 
 • 1997 йилда «Пахта Банк» S.W.I.F.T. жаҳон банклараро молиявий телекоммуникациялар ҳамжамияти аъзолигига қабул қилинди. 
 • 1998 йил Банкнинг фонд бозоридаги фаолиятини кенгайтириш мақсадида «Пахта-Инвест» Бошқаруви компанияси ва «Пахта-Сервис» Депозитарийси шўъба корхоналари таъсис этилди. 
 • 1999 йилда Қишлок Хўжалигини Кредитлаш Конфедерацияси (КИКА)нинг тенг ҳуқуқли аъзолигига киритилди. «Пахта Банк» ташкилий инфратузилмаси халқаро андозалар даражасида қайта шакллантирилди ва корпоратив Бошқарув тизимига ўтди. Замонавий услубдаги КИКА 1989 йилда ташкил қилинган. Ҳозирги пайтда дунёнинг 36 мамлакатидан 165 та қишлоқ хўжалиги йўналишидаги банк ва молиявий ташкилотлар КИКАнинг аъзоси ҳисобланади. Булар орасида Креди Агриколь (Франция), Рабобанк (Голландия), ДГ Банк (Германия), Райфайзенцентральбанк (Австрия) каби йирик банклар бор. «Пахта Банк» ана шундай нуфузли ташкилотга аъзо бўлиб кирганлиги банк тарихида янги саҳифа яратди. 
 • 1999 йилда Банкка Ўзбекистон Республикаси Ташқи иқтисодий фаолият Миллий банк орқали Германия «KFW» банкининг 1750 минг Евро миқдорида кредит йўналиши очилди.
 • 2000 йилда «Пахта Банк» Томсон Файненшиал Бэнк Вотч халқаро рейтинг компаниясининг халқаро баҳосига сазовор бўлди.
 • 2001 йилда Акциядорлик Тижорат «Пахта Банк» пластик карточкаси жорий қилинди.
 • 2001 йилда Давлатлараро имзоланган Меморандумга асосан Хитой Халқ Республикаси «Эксимбанк»ининг кредит линияси очилди.
 • Амалга оширилган барча саъй-ҳаракатлар банкнинг қабул қилинган бизнес-режалари ва бюджетини ижро этиш, банкнинг ликвидлик даражасини ошириш, акциядорларга дивиденд тўлаш имкониятини янада кенгайтирди. Буюк Британиянинг Нуфузли “THE BANKER” журнали ҳамда “FT Business” – “FT BUSINESS” – “Financial times” газетаси дунёдаги барча йирик банклар ўртасида ўтказган танловда иштирок этган “Пахта Банк” энг юқори натижага эришди ва у “Ўзбекистоннинг 2003 йилги энг яхши банки” деб эътироф қилинди.

 • 2004 йилда ҳам “Пахта Банк” Ўзбекистондаги йирик тижорат банклари орасида “Энг яхши банк” деб эътироф этилиб, ғолиблик сертификатини қўлга киритганлиги банк тарихида алоҳида муҳрланиб қолди.

 • Акциядорлик Тижорат “Пахта Банк”нинг юртимизда пластик карточкалар тизимини ривожлантириш борасида олиб бораётган кенг кўламли ишлари хорижда ҳам ўз эътирофини топди. Мамлакатимизнинг ушбу нуфузли банки Австриядаги “BGC Smartcard systems” компаниясининг “Энг илғор ҳамкор” сертификатига эга бўлди. 

 • 2007 йил 1 октябрь куни АТ “Пахта Банк” Ўзбекистон Республикаси тижорат банклари ичида биринчи бўлиб Fitch Ratings халқаро рейтинг компаниясининг тўлиқ халқаро рейтингини олишга муваффақ бўлди.  Fitch Ratings халқаро рейтинг компанияси Пахта Банкка қуйидаги рейтингларни берди: “B-” эмитент дефолтининг узоқ муддатли рейтинги (“ЭДР”), прогнози “Барқарор”, “B” қисқа муддатли ЭДР, “D/Е” шахсий рейтинги, “5” қўллаб-қувватлаш рейтинги ҳамда “В-” узоқ муддатли ЭДР қўллаб-қувватлаш. “Пахта Банк” томонидан инвестиция даражасининг халқаро рейтингини олиниши хорижий инвестицияларни жалб этиш, халқаро молия институтлари билан ҳамкорликни янада кенгайтириш ҳамда чуқурлаштириш юзасидан янги имкониятларни очади.

      Банк бошқарув тизимини янада такомиллаштириш, банкда ягона ахборотлар базасини шакллантириш, тўловларнинг ўтишини тезлаштириш орқали мижозларга қўшимча қулайлликлар яратиш мақсадида амалдаги мавжуд электрон тўлов тизими такомиллаштирилди.
      Шубҳасиз, эришилган бу ютуқларда АТ «Пахта Банк» салмоқли ўрин тутади. Истиқлол йилларида банк ўз фаолиятини тубдан ислоҳ қилиб, тўла универсаллашиб олди. Банк стратегиясининг истиқболли режаларига эришиш ва ташкилий тузилмасининг халқаро андозалар даражасидаги самарали фаолиятини таъминлаш борасида жадал сиёсат олиб борди. Хусусан, банк капиталини кескин кўпайтириш, унинг молиявий ҳолати ва кредит портфели сифатини яхшилаш, аҳолининг бўш пул маблағларини кенг кўламда жалб этишга алоҳида эътибор берди. Булар эвазига кичик бизнес ва хусусий тадбиркорлик субъектларини қўллаб-қувватлаш борасида ўз кредит қўйилмаларини кенгайтирди. Хусусий ресурслар базасини, шунингдек корпоратив акциялар билан операциялар салмоғини ўстирди.
       Шунингдек, халқаро банклар фаолиятини кучайтириш, банк операциялари ва хизматларининг янги турларини жорий этиш борасида банк фаолиятининг янги қирраларини намоён этди. Маркетинг нуқтаи назаридан таҳлил қилиш  жараёнида ҳамжиҳат ва сермаҳсул фаолият юритди. Хусусий депозит базаси кескин мустаҳкамланди.
       Яна шуни таъкидлаб ўтиш жоизки, банк фаолиятини  самарали юритишнинг асосий мезонларидан бўлмиш – ходимлар билан ишлаш, кадрлар сиёсатини кучайтиришга Банк Кенгаши ва Бошқаруви томонидан устувор аҳамият берилди. Банк Бошқарувининг олиб борган оқилона сиёсати амалга оширилган барча саъй-ҳаракатлари натижаси ўлароқ, банкниг ўтган йиллар давомида қабул қилинган барча бизнес-режалари ва бюджети бажарилишига эришилди.         
       Шунингдек, банкнинг ликвидлик ва фойдалилик даражасини оширишга, акциядорларга имкон қадар кўпроқ девидендлар тўлашга эътибор берилди. Айни пайтда Банк Ўзбекистонда ижтимоий-иқтисодий ислоҳотларнинг ўтказилиши жараёнида фаол иштирок этиш ва бу борада ўз зиммасига олган ҳамма вазифаларни беками-кўст бажаришга астойдил интилмоқда.