Молиявий хизматлар банклараро маркази биноси мажлислар залида республикамизнинг энг йирик ва универсал банкларидан бири Акциядорлик Тижорат “Пахта Банк” акциядорларининг йиллик Умумий ҳисобот Йиғилиши бўлиб ўтди. Бугунги кунда, 86 мингдан зиёд акциядорларига эга бўлган “Пахта Банк” Қорақалпоғистон республикаси ва 12 та вилоят бошқармаси, 186 та филиаллари ва 700 дан зиёд мини банклари орқали 205 мингдан зиёд юридик шахсларга ва 277 мингдан ортиқ жисмоний шахсларга комплекс банк хизматларини кўрсатиб келмоқда. Шунингдек, ўтган йилга нисбатан банк акциядорлари сони ҳам 7922 тага кўпайди.         

      Йиғилиш давомида мамлакатимиз иқтисодиёти, хусусан, қишлоқ хўжалигини тараққий топтиришда етакчи ўрин тутган ушбу банкнинг 2007 йилдаги даромадлари сарҳисоб қилиниб, фаолияти якунлари муҳокама этилиб, шу даврга мўлжалланган стратегик ривожланиш дастурлари ва банк бюджети режалари асосан бажарилганлиги қайд этилди, ҳамда банкнинг 2008 йилда ривожлантиришнинг асосий йўналишлари белгилаб олинди.  Жумладан, ўтган йилда эришган ютуқлари ҳақида гап борар экан, 2007 йил “Пахта банк” учун навбатдаги барқарор ўсиш даври бўлди. Нуфузли халқаро “The Banker” журнали Акциядорлик Тижорат «Пахта Банк»ни «Ўзбекистоннинг 2007 йилги энг яхши банки» деб эътироф этди, шунингдек, «Пахта Банк» Ўзбекистон Республикаси тижорат банклари орасида «Fitch Ratings» халқаро рейтинг компаниясининг «Барқарор» тоифасидаги тўлиқ рейтингини олган биринчи банкдир.          Банк олиб борган изчил фаолият бир қатор стратегик йўналишларда – бюджет сиёсатини такомиллаштириш, банкни капиталлаштириш, кредит ресурсларини асосан  иқтисодиётнинг реал сектори ва базавий тармоқларга йўналтириш, бухгалтерия ҳисоби ҳамда ҳисобот тизимини такомиллаштириш, инвестиция сиёсатини фаоллаштириш, кредитор ва инвесторлар ҳуқуқларини ҳимоялаш, чет эл капиталини жалб қилиш, банкнинг рақобатбардошлигини ошириш, юқори малакали кадрлар салоҳиятини шакллантириш, хизмат турларини кўпайтириш каби йўналишларда мавқеини мустаҳкамлаш ҳамда ривожлантириш имконини берганлиги таъкидлаб ўтилди.        

      Айниқса, банкнинг капитал базасини мустаҳкамлаш, иқтисодиётнинг реал секторини кредитлашни кўпайтириш, шу ўринда инвестицион жараёнларнинг асосий бўғинига айланган ҳолда мижозларнинг ҳақиқий ҳамкори сифатида фаолият юритиш борасидаги саъй-ҳаракатлари акциядорлар томонидан қўллаб-қувватланди.  2007 йил якуни бўйича банк ўз фаолиятида ижобий молиявий натижаларга эришди ва бу қуйидаги кўрсаткичларда ўз аксини топган.           Банкнинг жамланма капитали 2007 йил якуни бўйича 108,3 млрд. сўмни ташкил этиб, йил бошига нисбатан 42,1 млрд. сўмга ёки 63,7%га  кўпайди.         

      2007 йил давомида иқтисодиёт тармоқларига жами ажратилган кредитлар миқдори 795,4 млрд. сўмни ташкил этди.        

      Ҳисобот йилида ҳам, банкнинг кичик бизнес ва хусусий тадбиркорликни қўллаб-қувватлаш ишлари кескин фаоллашди.  “Пахта Банк” тизими бўйича барча молиялаштириш манбалари ҳисобидан ўтган йил давомида мазкур субъектларнинг 18072 та лойиҳалари бўйича берилган кредитлар миқдори 41 млрд. 478 млн. сўмни ташкил этди.Эътиборлиси шундаки, ушбу ажратилган кредитлар ҳисобига жорий йил давомида 26133 та янги ишчи ўринлари ташкил этилди ва 20 млрд. 990 млн. сўмлик маҳсулотлар ишлаб чиқарилди.     

     Ҳисобот йилида банкнинг ўз валюта маблағлари ҳисобидан иқтисодиётнинг реал секторини техник ҳамда технологик жиҳатдан қайта жиҳозлаш ва экспортбоп маҳсулотлар ишлаб чиқаришни кенгайтириш учун модернизацияга йўналтирилган кредитлар ҳажмини ошириш юзасидан ҳам муайян ишлар олиб борди.Жумладан банкнинг ўз маблағлари ҳисобидан “Бухоро Гилам” Ўзбекистон-Британия қўшма корхонасининг йилига 1,2 млн. кв.м. миқдорида экспортга йўналтириладиган гилам маҳсулотлари ишлаб чиқаришга мўлжалланган, кредит миқдори 2 млн. АҚШ долларига тенг бўлган ҳамда «Тўхтаниёз ота» фермер хўжалигининг маҳаллий хом ашё асосида импорт ўрнини босувчи макарон маҳсулотлари ишлаб чиқаришга мўлжалланган кредит миқдори 103,6 минг АҚШ долларига тенг бўлган лойиҳалари молиялаштирилди.  Германиянинг Ландес ҳамда Хипоферайнс банклари билан битим тузилиб, «Ройсон вайт гудс» қўшма корхонасининг экспортга йўналтирилган ва импорт ўрнини босувчи кир ювиш машиналари ҳамда музлаткичлар ишлаб чиқаришга қаратилган лойиҳаси учун Хипоферайнс банкининг кредит йўналиши ҳисобидан 3 миллион евро миқдорида маблағ ажратилди. Банк томонидан хорижий кредит йўналишлари ҳамда ўз маблағлари ҳисобидан кичик ва хусусий тадбиркорлик субъектларининг 51 та инвестиция лойиҳалари молиялаштирилиб, бунинг натижасида 1 654 дан зиёд янги ишчи ўринлари яратилди. Хулоса қилиб айтганда, ҳисобот йилида “Пахта Банк” ўзининг молиявий аҳволини янада барқарорлаштириш, ҳамда халқаро мавқеини мустаҳкамлаш йўлида изчил фаолият юритди.      

    АКЦИЯДОРЛИК ТИЖОРАТ “ПАХТА БАНК”АКЦИЯДОРЛАРИНИНГ 2008 йил 12  АПРЕЛЬ КУНИ ЎТКАЗИЛАДИГАННАВБАТДАГИ ЙИЛЛИК   

    УМУМИЙ ҲИСОБОТ ЙИFИЛИШИ КУН ТАРТИБИ 

       1. АТ “Пахта Банк”нинг 2007 молиявий йилдаги фаолият якунлари бўйича ҳисобот ҳамда 2008 йилда банк фаолиятининг асосий йўналишлари тўғрисида.

       2. АТ “Пахта Банк” Кенгаши ҳисоботини тасдиқлаш тўғрисида.

      3.Банкнинг йиллик ҳисоботи, бухгалтерия баланси, фойда ва зарарлар ҳисоботини тасдиқлаш ҳамда банк фойдасини тақсимлаш тўғрисида.

       4. АТ “Пахта Банк”нинг Тафтиш комиссияси ҳисоботини тасдиқлаш тўғрисида.

      5. АТ “Пахта Банк” Кенгаши аъзоларини қайта сайлаш тўғрисида.

      6. АТ “Пахта Банк” Уставини янги таҳрирда тасдиқлаш тўғрисида.

     7. “АТ “Пахта Банк” акциядорларининг Умумий йиғилиши тўғрисида” ҳамда “АТ “Пахта Банк”нинг Банк Кенгаши тўғрисида»ги Низомларига қўшимча ва ўзгартиришлар киритиш тўғрисида. 

    8. АТ “Пахта Банк”нинг Банк Бошқаруви тўғрисида»ги Низомини тасдиқлаш тўғрисида.

    9. АТ “Пахта Банк” Бошқаруви Раиси билан тузилган шартноманинг амал қилиш муддатини узайтириш тўғрисида.

   10. АТ “Пахта Банк”нинг ташқи аудиторини тасдиқлаш ҳамда унинг хизмат ҳақи миқдори чегарасини белгилаш тўғрисида.